De gleene Suhse war in Fer'chen
Bei ihrer Dande in Berlin,
nu frachd derheeme sie de Mudder:
,,War's scheen? Mechdst wieder du mal hin?"

,,Ach", meend de Gleene, ,,sei nich beese,

un hau mern Laadsch um Gobb nich rum,

doch was de Dande is in Breißen,
ich gloob', die is'n bißchen dumm.

 

Ämal, da hadd'ch so großen Hunger

Un wollde was ze Essen ham.
Ich sahchde: ,Dande! Änne Bemme!'

Da schluuch de Hände se zesamm.

 

Un wärklich, Mudder, gannst mersch glooben,

so guhd de Dande sonst ooch is,
in Gobbe hadd se geene Gritze:
die wußd' nich, was ne Bemme is!"