Nee häärnse, was de vorsche Nacht

dr Schtorm hat fier Graggehl gemacht,

das ware wärklich nich mähr scheene.
Mir zittern noch vor Schreck de Beene.

Grad um de Schtunde dr Geschbänster

da flooch ä Milchdobb von ä Fänster.

Un dr Ladärne dicht vorm Haus

där risses änne Scheibe raus.

Das hat geglärrt un hat geschärbelt,

wie wenn dr Deifel danzt un wärbelt.
Frihmorchens hing dn Schuster Zaube

sei Schild bloß noch an eener Schraube,

un dn Barbier sei Mässingbäcken

daat in ä Gartenbeete schtäcken.

Doch's Scheenste muß'ch zuletzt eich saachen
(Ganz leise, sonst geht mersch an dn Graachen):

Dr falsche Zobb von Freilein Lohme
där bammelt driem am Abbelboome.